द एलिअन टेक्नोलॉजी - ch ५. पूर्वभाग - एन्ड्रू ब्लान्कचे लेटर
बेडवर एलेक्स पालथा झोपला होता. अचानक जवळच्या डिजीटल अलार्म क्लॉक मध्ये सकाळच्या ८ चा गजर वाजू लागला. एलेक्सने झोपेतच अलार्म क्लॉकच्या टॅबवर जोरात हात मारला, तसे ते क्लॉक खाली पडले. अलार्म बंद होण्या ऐवजी आता अलार्मचा कर्कश असा आवाज येवू लागला. शेवटी एलेक्सने वैतागून क्लॉकचा प्लग सॉकेट मधून खेचून काढला. अलार्म बंद झाला अन एलेक्स पुन्हा झोपण्यासाठी कुशीवर वळला.
टिंग ऽऽऽ टोंग!!!
कोणीतरी दरवाज्याची बेल जोरात दाबली होती. पुन्हा झोपण्यासाठी कुशीवर वळलेला एलेक्स आता मात्र वैतागून बेडवरून उठला अन बेडरूम मधून बाहेर जाऊ लागला.
"काय कटकट आहे सकाळी-सकाळी. हा जॉन ना! ना स्वतः झोपत ना दुसऱ्याला झोपू देतो. याला आज चांगलाच धडा शिकवतो." एलेक्स आपल्याच मनाशी पुटपुटत दरवाजा खोलण्यासाठी दरवाजाकडे गेला.
"जॉन, कशाला सकाळी सकाळी त्रास देतोयस?" एलेक्स दरवाजा खोलतच म्हणाला.
दरवाजात कोणीच नव्हते.एलेक्स डोळे चोळत बाहेर आला त्याने इकडे तिकडे नजर फिरवीत बघितले. बाहेर जोग्गिंग करणारे, सायकलिंग करणाऱ्या शिवाय त्याला कोणीच दिसले नाही. त्याने पुन्हा वळून लॉनवर नजर फिरवली. कोणीच दिसले नाही म्हणून एलेक्स वळून रूम मध्ये जावू लागला, दारात काही लेटर्स पडली होती.
एलेक्स आता हॉलमधील डायनिंग टेबलवर बसून एक-एक लेटर्स वाचू लागला. पहिले लेटर सेंट - लुईस चर्चचे होते. त्यातील लिहिलेल्या मजकुरानुसार ते लेटर चर्चचे फादर जॉर्ज विल्लीयम (George William) यांनी एलेक्सला त्याने दिलेल्या आर्थिक सहाय्यासाठी थॅन्क्स गिविंग लेटर लिहिले होते. दुसरे लेटर एका बँकेचे होते, त्या अनुसार एलेक्सला लोन चुकवण्याची मुदत अजून सहा महिन्यांसाठी वाढवून मिळाली होती. आणि तिसरे लेटर होते ते एका पोलीस अधिकाऱ्याचे.
एलेक्सने ते लेटर पुन्हा निरखून पहिले. लेटर वर नाव तर त्याचेच होते, अ‍ॅड्रेस पण तोच होता. पण त्याला एका कॅनेडीयन पोलीस अधिकाऱ्याने आपल्याला पत्र पाठवावे याचेच आश्चर्य वाटत होते. त्याने पुन्हा लेटर पहिले, त्यावर कॅनेडीयन पूर्व विभागीय पोस्टल स्टॅम्प होता. एलेक्सची उत्सुकता वाढू लागली होती. त्याने क्षणाचाहि विलंब न करता ते पत्र फोडले अन तो वाचू लागला.
सर,
तुम्हाला कळवण्यात येते आहे कि तुमचे ग्रॅन्ड फादर डॉ. फ्रांक्लीन जोन्स गेले सहा दिवस आपल्या घरातून बेपत्ता आहेत. आम्हाला द क्रोकोडाइल रिवरच्या किनाऱ्यावर एक डेड-बॉडी सापडली आहे. या शवाचे मस्तक आणि पाय मगरींनी खाल्यामुळे, शवाची ओळख करण्यात येत नाही आहे. तरी आम्हाला हे शव डॉ. फ्रांक्लीन जोन्स यांचे असावे अशी शक्यता वाटत आहे. कृपया शवाची शहनिशा करण्यासाठी आपण यावे.
André Blanc
RCMP, Canada
No comments:
Post a Comment